DIPOLOG CITY (Marso 26, 2026) – Kapin 35 ka pasyente ang nakapahimulos sa libreng medical check-up ubos sa “Kuyog Ta Medical Program” nga gipahigayon sa Zamboanga del Norte Medical Center (ZNMC) sa Brgy. Sicayab.
Gipunting sa maong serbisyo ang mga kaso sa kasingkasing ug baga, lakip ang fistula creation alang sa mga pasyenteng nanginahanglan og dialysis, pinaagi sa mga espesyalistang doktor nga mitabang sa programa.
Sa miaging adlaw, duha usab ka pasyente nga adunay ovarian cyst ang malampusong naoperahan sa libreng OB-Gyne operation nga gihimo sa maong ospital.
Nagpadayon ang probinsyal nga pangagamhanan sa pagpalapad sa libre ug dekalidad nga serbisyong panglawas aron mas daghang residente, ilabi na ang mga kabus, ang matagaan og hustong atensyong medikal.(JENIFFER JR. DELICA)
Source: Zamboanga del Norte Provincial News Network