Bag-ong liderato ang mipuli sa Federation of Senior Citizens Associations of the Philippines (FSCAP)–Dapitan City Chapter atol sa ilang 2nd Quarter General Meeting ug election of officers nga gipahigayon sa Government Center Amphitheater karong adlawa.
Gitambongan kini sa mga lider sa senior citizens gikan sa 50 ka barangay aron hisgutan ug palig-onon ang mga programa alang sa kaayohan sa mga tigulang sa siyudad.
Napiling usab pagbalik isip FSCAP President si Rogelio L. Bengua, samtang napili sila Leonora I. Bermudo isip Vice President, Victoria J. Awit isip Secretary, Lolita S. Jamolod isip Treasurer, ug Narcisa T. Viernes isip Auditor.
Human sa eleksyon, gipangunahan ni Dapitan City Mayor Evelyn “Belen” T. Uy ang oath-taking ceremony sa tanang bag-ong opisyal ug barangay senior citizens presidents, isip simbolo sa ilang responsibilidad sa pagrepresentar ug pagpanalipod sa interes sa mga senior citizens.
Gisuportahan usab ang maong kalihokan nila City Councilor Bienvenido Dini-ay Sr., chairman sa Committee on Senior Citizens, ug OSCA Head Dra. Elena C. Hamoy, diin ilang gipasiugda ang kamahinungdanon sa lig-on nga liderato aron mas mapadangat ang tingog ug panginahanglan sa mga tigulang ngadto sa lokal nga panggamhanan.
Sa iyang mensahe, gipadayag ni Mayor Uy nga padayon ang plano sa LGU sa paghimo og dugang programa ug mga kalihokan nga magpalambo sa kahimsog, partisipasyon, ug kinabuhi sa mga senior citizens sa Dapitan.
Nagpabilin nga prayoridad sa Dapitan City ang inclusive governance pinaagi sa paghatag og mas lig-on nga representasyon ug suporta sa sektor sa senior citizens.(JENIFFER JR. DELICA)
Source: Dapitan City Government