Subay sa tinuig nga pag-obserbar sa World Tuberculosis (TB) Day karong Marso 24, ang Provincial Health Office (PHO) ning lalawigan sa Zamboanga del Norte ug Dapitan City Health Office mopahigayon sa edukasyon ug adbokasiya sa TB awareness campaign.
Kini ang nasayran gikan ni Ms. Marilete D. Jalosjos, National TB Control Program (NTP) Coordinator sa PHO.
Dugang ni Ms. Jalosjos nga ang NTP ug Health Promotion and Communication Unit (HPCU) sa Zamboanga Peninsula Center for Health Development (ZPCHD) katambayayong ang Dapitan CHO ug kagamhanang probinsyal mihimo’g lakang aron sa pagkunhod sa sakit nga TB sa tibuok probinsya.
Niini, adunay Free Walk-in Mobile Chest TB X-ray ang pagahimuon sa matag kalungsuran ug duruha ka dakbayan sa Dipolog ug Dapitan.
Ang maong x-ray gihimong libre alang sa tanan ilabina kadtong adunay gibati nga 2 ka semana nga pag-ubo ingon man, prayoridad usab niini ang adunay kasaysayan sa sakit nga TB.
Matud pa nga sa kaniadtong nakalabay’ng katuigan ang ZPCHD-NTP uban sa Philippine Business for Social Progress Project-ACCESS TB nagpahigayon ug mga programa aron mapalambo ang TB Care ning probinsya sama sa TB diagnosis, pagpatunhay sa programa ug sa pag-monitor batok sa maong sakit, pagpalig-on sa komunidad ug health system.
Base sa 2022 NTP Report ning lalawigan, natala ang 8,032 nga indibidwal ang nakapahimulos sa maong Free Walk-in Mobile Chest TB X-ray.
Samtang, sumala pa ni Ms. Jalosjos nga kaniadtong tuig 2022 adunay 2,433 ang natala nga na-positibo sa sakit nga tuberculosis
Diin, karong tuiga buot ipasabwag sa kagamhanang probinsyal pinaagi sa PHO nga adunay mga schedule matag kalungsuran lakip na ang dakbayan sa Dipolog ug Dapitan sa maong libre nga chest x-ray.
Source: PIC Zanorte