Padayon ang pagpalapad sa food security program sa Dapitan City pinaagi sa Local Government Support Fund (LGSF) Rice Distribution Program, diin 923 ka panimalay sa Barangay Sinonoc ug Barangay Baylimango ang nakadawat og tig-10 ka kilo nga bugas niadtong Agosto 4.
Lakip sa mga benepisyaryo ang 527 ka pamilya sa Barangay Sinonoc ug 396 ka pamilya sa Barangay Baylimango.
Aron masiguro ang hapsay, luwas ug episyenteng pag-apod-apod, gidala mismo sa distribution team ang rice assistance ngadto sa matag panimalay. Pinaagi sa house-to-house nga pamaagi, wala na kinahanglana nga mobiya pa sa ilang mga balay o moundang sa ilang panginabuhian ang mga benepisyaryo aron makadawat sa maong tabang.
Nagpasalamat usab ang mga pamilya sa maong inisyatiba, nga matud nila nakatabang sa pagpagaan sa ilang adlaw-adlaw nga gasto ug sa pagsuporta sa ilang panginahanglan.
Gipangulohan ang kalihokan ni Mr. Iolus Edgar Adasa, Programs and Services City In-Charge ug Community Affairs Officer sa City Mayor’s Office, kauban ang mga personnel sa City Social Welfare and Development Office (CSWDO), barangay officials, ug uban pang local government staff.(IKEN B. GULLEM)
Source: Dapitan City Government