Kaluhaan ug walo (28) ka representante gikan sa nagkadaiyang pribadong establisimyento sa Dapitan City ang malampusong nakatapos sa duha ka adlaw nga Disaster Risk Reduction and Management (DRRM) Training Course nga gipahigayon sa Office of Civil Defense (OCD) Region IX ug City Disaster Risk Reduction and Management Office (CDRRMO) gikan Agosto 3 ngadto sa 4 sa DCGEA-MPC Function Hall sa Barangay Dawo.
Sa kinatibuk-an, 34 ka partisipante ang mitambong sa capacity-building activity nga nagtumong sa pagpalig-on sa kahandam sa pribadong sektor batok sa mga kalamidad ug pagpalambo sa koordinasyon sa emergency response.
Sa iyang mensahe, gipasiugda ni City Vice Mayor Gabriel M. Cad ang dakong papel sa pribadong sektor sa pagmintinar sa business continuity, pagbangon human sa kalamidad, ug pagsuporta sa kaluwasan sa komunidad.
Lakip sa mga resource speakers ang mga eksperto gikan sa OCD Region IX, PHIVOLCS Dipolog, Bureau of Fire Protection, City DRRMO, Department of Trade and Industry, ug Philippine Red Cross Zamboanga del Norte Chapter.
Gituki sa pagbansay ang Philippine DRRM System, earthquake ug tsunami awareness, hazard assessment, disaster control group organization, workplace safety, ug Business Continuity Planning. Gipailalom usab ang mga partisipante sa Basic Life Support (BLS) training ug evacuation simulation aron mapalig-on ang ilang kahibalo sa aktuwal nga emergency response.
Sa pagtapos sa programa, 28 ka partisipante ang nakakompleto sa tibuok kurso samtang unom ang nakadawat og certificates of participation.(IKEN B. GULLEM)
Source: Dapitan City Government