Pirmado na ang implementasyon sa ₱46,999,995.82 nga Common Post-Harvest Facility (CPHF) sa Barangay Bagting pinaagi sa Memorandum of Agreement tali sa DA-BFAR Region IX ug sa City Government of Dapitan ubos sa Philippine Fisheries and Coastal Resiliency (FishCORE) Project.
Kini nga pasilidad gilauman nga makapauswag sa post-harvest handling, fish processing, ug cold storage sa mga kuhang isda, nga makatabang sa pagkunhod sa pagkalugi human sa pangisda ug pagtaas sa kalidad ug kantidad sa produkto sa mga mananagat.
Ubos sa kasabutan, ang dakbayan sa Dapitan maoy motubag sa paghatag sa project site, pagkuha sa mga gikinahanglang permit, ug pagpatuman sa mga lokal nga ordinansa ug programa alang sa pagdumala sa pangisda ug kabaybayonan.
Ang proyekto kabahin sa FishCORE Program nga nagtumong sa pagpalig-on sa industriya sa pangisda pinaagi sa modernong imprastraktura ug paghatag og mas lig-on ug malungtarong panginabuhian sa mga lokal nga mananagat.(IKEN B. GULLEM)
Source: Dapitan City Government