Opisyal nang giturn-over sa Kagamhanang Probinsyal ug sa Local Government Unit sa Jose Dalman ang tulo ka infrastructure projects sa Barangay Madalag nga adunay kinatibuk-ang kantidad nga ₱3 milyon.
Gilangkoban ang mga proyekto sa 180 metros nga road concreting nga nagkantidad og ₱1 milyon gikan sa pundo sa probinsya, 110 metros nga road concreting nga nagkantidad og ₱500,000, ug usa ka multi-purpose building nga nagkantidad og ₱1.5 milyon nga gipondohan pinaagi sa 20% Economic Development Fund (EDF).
Gipangunahan nila Governor Darel Dexter Uy ug Mayor Allen Ferrater ang ceremonial turnover, uban sa ubang lokal nga opisyal, diin ilang gipasiugda ang padayon nga paghatag og mga proyekto aron mapalambo ang imprastraktura ug serbisyo sa lungsod.
Sumala kang Gov. Uy, dili pa kini mao ang katapusan sa mga proyektong ipatuman sa probinsya, samtang gipasalamatan usab sa lokal nga panggamhanan sa Jose Dalman ang suporta nga ilang nadawat alang sa padayon nga kalamboan sa ilang komunidad.(IKEN B. GULLEM)
Source: Zamboang adel Norte Provincial News Network