DAPITAN CITY (June 13, 2026) — Gipakusog sa Dapitan City Fire Station ang kampanya sa fire safety pinaagi sa Fire Truck Visibility activities nga gipahigayon sa nagkalain-laing bahin sa syudad ubos sa pagpanguna ni FSINSP Rommel M. Rojas, REE, Acting City Fire Marshal.
Tumong sa maong kalihokan ang pagpahinumdom sa publiko sa kahinungdanon sa paglikay sa sunog ug pagpalambo sa kahibalo sa komunidad bahin sa emergency preparedness pinaagi sa makita ug aktibong presensya sa mga fire truck sa mga pampublikong lugar.
Matud sa BFP, ang regular nga paglibot sa mga fire truck dili lamang simbolo sa andam nga pagresponde sa emerhensya kondili usa usab ka paagi aron mapalig-on ang kooperasyon sa katawhan sa paglikay sa mga insidente sa sunog.
Pinaagi niini nga inisyatiba, gipakita sa Dapitan City Fire Station ang padayon nga dedikasyon sa pagpanalipod sa kinabuhi, kabtangan, ug kalikupan samtang gipalig-on ang kultura sa kaluwasan ug kalig-on sa komunidad.
Nagpadayon ang BFP Dapitan sa paghatag og episyente ug responsableng serbisyo publiko aron masiguro ang kahandam ug seguridad sa tanang Dapitanon.(JENIFFER JR. DELICA)
Source: BFP R9 Dapitan City Fire Station