Gipadayon sa Dapitan City Fire Station ang kampanya sa kahandam sa emerhensya pinaagi sa pagpahigayon sa “Exit Drill in the Homes” (EDITH) sa lokal nga komunidad aron masiguro nga andam ang matag panimalay sa posibleng insidente sa sunog.
Ubos sa giya ni FSINSP Rommel M. Rojas, REE, Acting City Fire Marshal, gitudluan ang mga residente sa husto ug organisadong paagi sa pag-evacuate gikan sa ilang mga balay panahon sa emerhensya.
Imbis tradisyonal nga lektyur, gigamit sa mga bombero ang mga instructional videos aron mas sayon masabtan ug mas epektibo nga maipahibalo ang mga batakang lakang sa kaluwasan ug paglikay sa peligro.
Sumala sa BFP, ang maong inisyatiba nagtumong sa pagpalig-on sa kahandam sa matag pamilya ug paghimo og klaro nga evacuation plan nga mahimong sundon kung adunay sunog o uban pang emerhensya.
Nagpabilin ang Dapitan City Fire Station sa pagpalambo sa kaluwasan ug resiliency sa komunidad pinaagi sa padayon nga mga programa nga nag-awhag sa mga residente nga mahimong alerto ug andam sa tanang panahon.(JENIFFER JR. DELICA)
Source: BFP R9 Dapitan City Fire Station