BANGKOK, THAILAND — Nagbukas og bag-ong mga oportunidad alang sa mga lokal nga negosyo si Governor Darel Dexter T. Uy human motambong sa ProPak Asia 2026, usa sa pinakadakong eksibisyon sa Asya alang sa food processing, packaging ug manufacturing technologies.
Kauban ang mga lokal nga lider ug representante sa Micro, Small and Medium Enterprises (MSMEs), gisusi sa delegasyon ang pinakabag-ong mga teknolohiya, modernong mga makina ug mga inobasyon nga makatabang sa pagpausbaw sa kalidad ug produksyon sa mga produkto gikan sa Zamboanga del Norte.
Dugang sa pagkat-on sa mga bag-ong sistema, nakigkita usab ang grupo sa mga internasyonal nga investors, suppliers ug potensyal nga business partners aron mapalapad ang merkado sa mga lokal nga produkto ug makadala og bag-ong kahigayonan sa negosyo ngadto sa probinsya.
Gilauman nga ang mga kahibalo ug koneksyon nga ilang nadala gikan sa Thailand makatabang sa pagpalig-on sa mga MSMEs, pagdani og dugang pamuhunan, pagmugna og trabaho ug pagdasig sa mas kusog nga pagtubo sa ekonomiya sa Zamboanga del Norte.
Ang pag-apil sa maong internasyonal nga kalihokan nagpakita sa tinguha sa probinsya nga dili lamang mosabay sa modernisasyon, kondili manguna usab sa pag-abli sa bag-ong mga oportunidad alang sa mga negosyante ug komunidad sa Bag-ong ZaNorte.(JENIFFER JR. DELICA)
Source: Zamboanga del Norte Provincial News Network