Nagpahigayon og Fire Square Road Show ang Bureau of Fire Protection pinaagi sa Dipolog City Fire Station niadtong Marso 7, 2026 sulod sa CityMall Dipolog aron mapalambo ang kahibalo sa mga bata bahin sa fire safety ug kaluwasan.
Ang kalihokan gipangunahan ni Acting City Fire Marshal Aprilyn B. Barboso, diin gipasabot sa mga BFP personnel sa mga bata ang mga katungdanan ug responsibilidad sa mga bombero ug ang importansya sa kahibalo sa kaluwasan batok sa sunog.
Gitumong sa programa nga matudloan ang kabataan sa praktikal nga mga pamaagi sa kaluwasan lakip na ang hustong paggamit sa fire extinguisher, basic life support ug CPR, knot tying, rappelling, fire exit drills sa balay, ug ang husto nga pagsul-ob ug pagtangtang sa firefighting equipment.
Pinaagi sa maong kalihokan, gilauman nga mas mapalig-on ang kahibalo ug kahanduman sa mga bata sa paglikay sa sunog ug sa pag-atubang sa mga emerhensiya, isip kabahin sa pag-andam sa mas luwas nga kaugmaon sa komunidad.(JENIFFER JR. DELICA)
Source: BFP R9 Dipolog City Fire Station