Gipahigayon sa Bureau of Fire Protection (BFP) Dipolog City Fire Station ang Fire Safety Inspection sa Upper Dicayas Integrated School niadtong Hunyo 3 aron masuta ang pagsunod sa eskwelahan sa mga sumbanan ug regulasyon sa kaluwasan batok sa sunog.
Gipangulohan ang maong kalihokan ni FSINSP APRILYN B. BARBASO, Acting City Fire Marshal, uban sa mga Fire Safety Inspector sa estasyon nga mitan-aw sa kahimtang sa mga pasilidad ug mga lakang nga gipatuman aron malikayan ang posibleng sunog sulod sa eskwelahan.
Gitumong sa inspeksyon ang pag-ila sa mga posibleng peligro nga mahimong hinungdan sa sunog ug pagsiguro nga husto ang pagpatuman sa mga fire safety measures sa school premises. Naghatag usab ang mga personnel sa BFP og giya bahin sa fire prevention ug kahandam panahon sa emerhensya.
Gipalig-on sa BFP ang ilang pasalig sa pagmintinar sa luwas ug hapsay nga palibot sa pagkat-on pinaagi sa padayon nga pagpahigayon og fire safety inspections alang sa kaayohan sa mga estudyante ug mga kawani sa eskwelahan.(JENIFFER JR. DELICA)
Source: BFP R9 Dipolog City Fire Station