Nahuman sa tulo ka adlaw nga Emergency Operations Center (EOC) Training Course ang 38 ka responders sa Dapitan City Disaster Risk Reduction and Management Office (CDRRMO) nga gipahigayon sa DCGEA-MPC Building sa Sunset Boulevard, Barangay Dawo, Dapitan City.
Gidumala ang maong pagbansay sa mga disaster management experts gikan sa Office of Civil Defense (OCD) Pagadian nga gipangulohan nila Chief of Capacity Building and Training Section Angelito R. Casinillo ug Planning Officer Michelle Fernandez-Yague, uban sa partisipasyon nila Dipolog City CDRRMO EOC Manager Bryan Jauculan ug Dapitan CDRRMO EOC Manager Nelson Quimiging.
Mitambong usab sa programa si OCD Region IX Regional Director Atty. Ruel S. Halanes ug City Councilor Raul Carreon aron ipakita ang ilang suporta sa mga responder nga nagpalambo sa ilang kahibalo ug kahanas sa pagdumala sa mga emerhensya ug katalagman.
Gipunting sa maong training ang pagpalig-on sa komunikasyon, koordinasyon sa mga ahensya, ug episyenteng pagdumala sa mga operasyon panahon sa krisis. Sumala sa kagamhanang lokal, kabahin kini sa padayong paningkamot ubos sa suporta ni Mayor Evelyn “Belen” T. Uy aron mas mapalig-on ang kaandam sa Dapitan batok sa nagkalain-laing emerhensya ug kalamidad.(JENIFFER JR. DELICA)
Source: City Information Division- Dapitan