Nanguna ang dengue isip sakit nga may pinakadaghang natala nga kaso sa Zamboanga del Norte, sumala sa Provincial Department of Health Office-Zamboanga del Norte (PDOHO-ZN) atol sa Health Media Forum nga gipahigayon niadtong Hunyo 3 sa Provincial Capitol sa Dakbayan sa Dipolog. Sa report hangtod Mayo 28, 2026, miabot sa 334 ang kaso sa dengue nga maoy labing taas tali sa mga gimonitor nga sakit sa probinsya.
Gipadayag ni Jonathan Karlo C. Rhudy, RN, Health Program Officer II ug Disease Surveillance Officer sa PDOHO-ZN, nga sunod sa dengue ang influenza-like illness nga adunay 328 ka kaso, gisundan sa acute bloody diarrhea nga adunay 20, measles nga adunay 19, ug hand, foot and mouth disease nga adunay 10 ka kaso. Sa maong gidaghanon, 33 ang nakompirmar nga kaso sa dengue ug lima sa measles.
Giklaro sa ahensya nga bisan sa pagsaka sa kaso sa dengue, wala pay natala nga namatay tungod niini sa probinsya. Hinuon, adunay duha ka namatay sa rabies, duha sa acute meningitis-encephalitis syndrome, ug usa sa non-neonatal tetanus. Sa dengue cases, ang Siocon ang adunay pinakadaghang natala nga kaso nga 94, gisundan sa Dipolog City nga adunay 50 ug Dapitan City nga adunay 32.
Giawhag sa mga otoridad sa panglawas ang publiko nga magpadayon sa pagpanglimpyo sa palibot ug pagwagtang sa mga posibleng pamuy-anan sa lamok aron malikayan ang dugang pagsaka sa kaso sa dengue, samtang padayon usab ang pagmonitor sa ubang notifiable diseases sa tibuok probinsya.(JENIFFER JR. DELICA)
Photo: Zamboanga del Norte Provincial News Network