Nagsugod na ang pagpangandam alang sa “KALASAG–Zamboanga del Norte” Inter-Agency Territorial Defense Operation (IATDO) Exercise 02-2026 pinaagi sa Oversight Committee Meeting nga gipasiugdahan sa 97th Infantry (KALASAGLAHI) Battalion, 1st Infantry (TABAK) Division, Philippine Army niadtong Hulyo 14 sa Museo Dipolog.
Gitambongan ang panagtigom sa mga representante sa nagkalain-laing ahensya sa gobyerno, Philippine Army, Philippine National Police ug uban pang partner agencies aron hisgutan ang koordinasyon ug mga buluhaton sa matag partisipante alang sa hapsay nga pagpatuman sa exercise nga gikatakdang ipahigayon sa Agosto 19 ug 20 sa Dipolog City.
Sumala sa plano, ang actual evacuation drill pagahimoon sa Barangay Olingan, samtang ang urban battle simulation ipahigayon sa kabaybayonan sa Miputak ug Galas, lakip ang Dipolog Boulevard.
Gihisgutan usab sa panagtigom ang mga lakang aron maseguro ang episyenteng koordinasyon sa tanang nalambigit nga mga ahensya atol sa simulation exercise, nga nagtumong sa pagsulay sa kahandam sa mga pwersa ug sa mga responder sa pag-atubang sa posibleng hulga sa seguridad.
Usa sa gihatagang gibug-aton ang pagpakaylap sa tukmang impormasyon ngadto sa publiko aron malikayan ang kalibog ug misinformation. Matud sa mga otoridad, adunay mga sayop nga impormasyon nga mikaylap atol sa miaging IATDO Exercise nga gipahigayon sa lungsod sa Manukan.
Gipasabot usab nga mogamit ang exercise og mga military assets ug adunay madungog nga mga buto sa armas isip kabahin sa simulation nga naghulagway sa senaryo sa pagsulong sa armadong grupo pinaagi sa kadagatan.
Gipasalig sa 97th Infantry Battalion nga pagbansay lamang ang maong kalihokan ug walay angay ikabalaka ang publiko, tungod kay kini kabahin sa pagpalig-on sa inter-agency coordination ug kahandam sa pag-atubang sa mga emerhensiya ug hulga sa seguridad.(IKEN B. GULLEM)
Source: Zamboanga del Norte Provincial News Network