Gipahigayon sa Department of Agrarian Reform (DAR) ang final inspection ug validation sa nahuman nga Farm-to-Market Road concreting project nga nagkantidad og ₱22 milyon sa lungsod sa Mutia, Zamboanga del Norte.
Kini nga proyekto naglangkob sa pagsemento sa dalan gikan sa Fundador Street paingon sa Barangay Santo Tomas aron mapadali ang transportasyon sa mga produktong agrikultural ug mas mapalambo ang koneksyon sa mga komunidad sa kabanikanhan.
Gipangulohan sa validation team nila PARPO Engr. Randy Frogosa ug Gerry Pascua sa DAR Project Management Service ang inspeksyon uban sa ubang opisyal gikan sa DAR Support Service Office, COA Regional Office, DAR Provincial Office sa Zamboanga del Norte, ug Local Government Unit sa Mutia. Gisusi sa grupo ang kalidad sa konstruksyon, pisikal nga progreso, ug pagsunod sa technical requirements sa proyekto.
Matud pa sa DAR, ang road concreting project makatabang sa pagkunhod sa hauling ug travel costs sa mga mag-uuma samtang mapadali usab ang ilang pag-access sa merkado ug ubang importanteng serbisyo.
Gipasiugda usab sa ahensya ang ilang padayong pagpatuman sa mga proyekto nga makapadasig sa kalamboan sa agrikultura ug ekonomiya sa kabanikanhan.(IKEN B. GULLEM)
Source: DAR Zamboanga del Norte Province