Dungan nga nasaksihan sa mga football fans sa Dipolog City ang FIFA World Cup 2026 Final atol sa public watch party nga gipahigayon sa Provincial Government of Zamboanga del Norte ug City Government of Dipolog ganihang kaadlawon alas 3:00 petsa Hulyo 20.
Gipasalida ang championship match tali sa Spain ug Argentina pinaagi sa giant LED wall screen sa D’Food Hub & Events Center sa Dipolog Boulevard, diin nagtigom ang mga supporters aron mosubay sa usa sa labing dako nga sporting event sa kalibotan.
Nagpakita usab og suporta ang mga nanambong pinaagi sa pagsul-ob sa kolor sa ilang paboritong team, nga nakadugang sa kahinam sa maong kalihokan.
Aron masiguro ang malinawon ug hapsay nga watch party, hugot nga gipatuman ang pagdili sa sugal ug pag-inom og ilimnong makahubog.
Pinaagi sa maong kalihokan, nagkausa ang mga football enthusiasts sa Zamboanga del Norte sa pagsaulog sa FIFA World Cup Final ug sa pagpaambit sa ilang gugma sa football.(IKEN B. GULLEM)
Source: Zamboanga del Norte Provincial News Network