Kapin sa 200 ka residente sa Barangay Olingan, Dipolog City ang gihiusa sa usa ka Drug Awareness and Prevention Lecture niadtong Hulyo 18, aron mapalig-on ang kampanya batok sa ilegal nga droga ug mapanalipdan ang ilang pamilya ug komunidad.
Gitambongan kini sa mga opisyal sa barangay, tanod, 4Ps beneficiaries, ginikanan, kabatan-onan ug uban pang miyembro sa komunidad sa Relocation Site Covered Court pinaagi sa panagtambayayong sa Provincial Government of Zamboanga del Norte ug sa Philippine National Police Drug Enforcement Group–Special Operations Unit-9.
Gipasabot sa mga resource speakers ang makadaot nga epekto sa ilegal nga droga, ang mga sayong timailhan sa substance abuse, ug ang papel sa komunidad sa pagpugong sa pagkatag sa maong bisyo.
Nagpasalamat si Barangay Chairperson Francisca L. Maquiling sa probinsyal nga kagamhanan sa pagdala sa maong kalihokan ngadto sa barangay. Matud niya, importante ang padayon nga pag-edukar sa mga residente, ilabina sa kabatan-onan, aron malikayan ang peligro ug mga sangpotanan sa paggamit sa ilegal nga droga.
Gipasalamatan usab niya si Governor Darel Dexter T. Uy sa padayon nga pagsuporta sa mga programa nga nagpalig-on sa kahibalo ug pagkamabinantayon sa mga komunidad batok sa ilegal nga kalihokan.
Dugang pa, giawhag ni Provincial Anti-Drug Abuse Council (PADAC) Focal Person Engr. Dioscoro G. Endab ang mga partisipante, ilabina ang kabatan-onan, nga magpabiling nakatutok sa ilang mga pangandoy ug likayan ang bisan unsang butang nga makadaot sa ilang kaugmaon.
Samtang, miambit og mensahe ang mga representante sa Philippine National Police ug PNP Drug Enforcement Group isip pagpakita sa ilang suporta sa kampanya kontra ilegal nga droga.
Lakip sa mga resource speakers ang mga representante sa Department of Health, Philippine Drug Enforcement Agency (PDEA), ug PNP Drug Enforcement Group–Special Operations Unit-9, nga misunod sa usa ka open forum aron tubagon ang mga pangutana sa mga partisipante.(IKEN B. GULLEM)
Source: Zamboanga del Norte Provincial News Network