Pormal nang giablihan ang Ma. Cristina–Ma. Uray Farm-to-Market Road (FMR) nga gilauman maghatag og dakong benepisyo sa mga mag-uuma ug residente sa kabukiran sa Dakbayan sa Dapitan.
Pinaagi sa maong dalan, mas sayon ug mas paspas na ang pagbiyahe sa mga mag-uuma sa pagdala sa ilang mga produkto ngadto sa merkado, nga nagpasabot og mas ubos nga gasto sa transportasyon ug mas gamay nga kadaut sa ani. Mapahimuslan usab kini sa mga residente alang sa adlaw-adlaw nga biyahe, ilabi na sa panahon sa ting-ani ug emerhensiya.
Ang proyekto, nga adunay gitas-on nga 1.3–1.5 ka kilometro ug gipondohan sa Department of Agriculture sa kantidad nga 20 milyones pesos, gilauman nga mopataas sa kita sa mga mag-uuma, mopasig-uli sa lokal nga kalakalan, ug mopalig-on sa ekonomiya sa mga barangay sa Ma. Cristina ug Ma. Uray.
Sa pag-abli sa Ma. Uray Farm-to-Market Road, mas duol na ang merkado sa mga mag-uuma ug mas lig-on ang dalan padulong sa kalamboan sa kabukiran sa Dapitan.(IKEN B. GULLEM)
Source: City Government of Dapitan