Opisyal nga gisugdan sa City Government of Dapitan ang selebrasyon sa National Arts Month 2026 pinaagi sa unang sesyon sa Lihok: Minds in Motion webinar niadtong milabay nga adlaw.
Kini nga kalihokan nagbukas sa usa ka bulan nga programa sa arts ug kultura ubos sa temang “LIHOK: Art in Motion,” nga nahiuyon sa nasudnong tema “Ani ng Sining: Katotohanan at Giting.” Mitambong atol sa kalihokan ang mga campus journalist, creative workers, magtutudlo, ug mga estudyante gikan sa nagkalain-laing institusyon.
Samtang, gipasiugdahan ang webinar ni Mr. Jeff Klein, Chairperson sa Region 9 Creative Industry Development Council, nga mituki sa mga isyu ug oportunidad sa creative sector.
Matod sa mga opisyal sa dakbayan, tumong sa serye sa webinar nga mapalapad ang kahibalo sa polisiya, etikal nga pamatasan, ug propesyonal nga kahanas sa lokal nga mga artista. Ang sunod nga mga sesyon gikatakda sa Pebrero 11, 18, ug 27, uban pa sa nagkalain-laing kalihokan sulod sa bulan, nga nagpakita sa padayon nga suporta sa dakbayan sa malungtarong creative industry sa Dapitan.(IKEN B. GULLEM)
Source: City Government of Dapitan