Malampusong napahiusa pag-usab ang usa ka pamilya gikan sa Barangay Nabilid pinaagi sa Pag-Abot Program sa Department of Social Welfare and Development (DSWD) human maluwas ang usa ka inahan ug iyang anak sa Pampanga diin sila nagpuyo isip street dwellers ubos sa lisod ug delikadong kahimtang.
Nahitabo ang family reintegration pinaagi sa panagtambayayong sa DSWD Field Office III, DSWD Field Office IX, Municipal Social Welfare and Development Office (MSWDO) sa Porac, Pampanga, ug MSWDO sa President Manuel A. Roxas.
Gitambongan usab kini ni Mayor Ismael A. Rengquijo Jr., MSWD Head Alfeo R. Bubutan, ug mga kawani sa MSWDO isip pagpakita sa padayon nga suporta sa lokal nga panggamhanan alang sa kaayohan ug proteksyon sa mga pamilyang nanginahanglan.
Sumala sa mga otoridad, ang maong inisyatiba nagpakita sa dedikasyon sa DSWD ug mga lokal nga panggamhanan sa paghatag og paglaum, proteksyon, ug bag-ong oportunidad alang sa mga indibidwal ug pamilyang nakasinati og kapuy-an ug uban pang kalisdanan sa kinabuhi.(IKEN B. GULLEM)
Source: MSWDO PRES. MA. ROXAS