Gipahigayon sa Dapitan City Fire Station ang Exit Drill in the Home (EDITH) ug Fire Safety Lecture sa Bacong Integrated School sa Barangay Taguilon, Dapitan City, aron mapalig-on ang kahibalo ug kaandam sa mga estudyante, magtutudlo ug mga sakop sa komunidad panahon sa emerhensya.
Gidumala ang maong kalihokan sa mga personnel sa estasyon ubos sa pagpanguna ni FSINSP Rommel M. Rojas, REE, Acting City Fire Marshal. Gitun-an sa mga partisipante ang hustong pamaagi sa pag-evacuate, mga lakang sa pagtubag sa emerhensya, ug mga batakang paagi sa paglikay sa sunog.
Gipasiugda usab sa lecture ang importansya sa adunay andam nga evacuation plan, pag-ila sa luwas nga exit routes, ug pagpabiling kalmado panahon sa peligro aron malikayan ang kalibog ug dugang nga kadaot.
Dugang pa, gipakita sa mga bombero ang hustong paggamit sa fire extinguisher pinaagi sa TPASS technique aron mas masabtan sa mga partisipante ang praktikal nga mga pamaagi sa pag-atubang sa posibleng sunog. Sumala sa BFP, kabahin kini sa ilang padayon nga kampanya sa pagpalambo sa kultura sa kaluwasan, kaandam ug kalig-on sa mga eskwelahan ug komunidad.(JENIFFER JR. DELICA)
Source: BFP R9 Dapitan City Fire Station