Nagpadayon sa paghatag og suporta sa edukasyon ang Liloy Municipal Fire Station pinaagi sa Adopt-A-Scholar Initiative, usa ka programa sa Bureau of Fire Protection nga nagtumong sa pagtabang sa mga estudyanteng nanginahanglan aron mapadayon ang ilang pag-eskwela.
Mihatag og boluntaryong asistensya ang mga personnel sa estasyon ubos sa pagmando ni Acting Municipal Fire Marshal FINSP Dave C. Dela Cruz ngadto sa ilang napiling iskolar atol sa kalihokan nga gipahigayon sa estasyon niadtong Hunyo 5.
Tumong sa maong inisyatiba ang paghatag og dugang suporta sa mga kabatan-onan nga adunay tinguha nga makatapos sa pag-eskwela ug makab-ot ang ilang mga pangandoy sa kinabuhi bisan pa sa mga kalisod sa pinansyal nga kahimtang.
Gipasiugda sa BFP nga gawas sa ilang mandato sa pagpanalipod sa kinabuhi ug kabtangan batok sa sunog, nagpabilin usab silang kaabag sa paghulma sa mas maayong kaugmaon sa kabatan-onan pinaagi sa edukasyon ug mga programang makapalig-on sa komunidad.(JENIFFER JR. DELICA)
Source: BFP R9 Liloy Fire Station