Baynte-dos (22) ka mga presidente sa Community-Based Forest Management Agreement (CBFMA) People’s Organizations gikan sa walo ka lungsod ubos sa sakop sa CENRO Liloy ang mitambong sa reorientation aron mapalig-on ang ilang kahibalo sa responsableng pagdumala sa kalasangan ug pagtuman sa ilang mga obligasyon isip mga tigdumala sa timberland areas.
Gipunting sa kalihokan ang pagpasabot sa mga bag-o ug kasamtangang lider sa mga polisiya, balaod sa kalasangan, ug mga kondisyon nga kinahanglan sundon ubos sa ilang mga kasabutan. Nahimo usab kini nga higayon aron mapalig-on ang koordinasyon tali sa mga organisasyon ug sa bag-ong liderato sa CENRO Liloy.
Gipasiugda ni OIC CENRO Maribel Acama ang kahinungdanon sa pagsunod sa hustong pamaagi sa pagputol ug pag-ani sa mga kahoy sulod sa CBFMA areas. Matud niya, ang pagsunod sa mga regulasyon makatabang sa paglikay sa mga paglapas sa balaod ug posibleng aksyon gikan sa mga otoridad.
Ang Community-Based Forest Management usa ka estratehiya nga nagtugot sa mga komunidad nga mahimong aktibong kaabag sa pagpanalipod, pagpreserbar, ug malungtarong pagpalambo sa mga kalasangan pinaagi sa responsableng paggamit sa mga kahinguhaan niini.
Gilauman nga pinaagi sa maong reorientation, mas mapalig-on pa ang paningkamot sa mga lider sa CBFMA sa pag-atiman ug pagpreserbar sa kalasangan aron mapadayon ang kaayohan niini alang sa umaabot nga mga henerasyon.(JENIFFER JR. DELICA)
Source: DENR Zamboanga Peninsula