Gilunsad sa Department of Trade and Industry o DTI ang SSF Project alang sa Establishment of Engineered Bamboo Facility niadtong nilabay nga adlaw sa lungsod sa Rizal, Zamboanga del Norte aron mapalig-on ang lokal nga industriya sa kawayan ug panginabuhian sa mga micro-entrepreneurs.
Gipangulohan ni Regional Director Engr. Al-Zamir I. Lipae, CESO III ug DTI-ZDN Provincial Director Estrella M. Roda ang launching ceremony uban sa pagtambong ni Rizal Mayor Marissa D. Manigsaca ug BAROG President ug kanhi SB Member Dante Molina.
Nagkantidad og kapin 1.8 milyones pesos ang maong proyekto ubos sa Shared Service Facility Program diin maghatag kini og modernong kagamitan aron matabangan ang mga lokal nga bamboo processors sa paghimo og dekalidad ug high-value commercial products gikan sa hilaw nga kawayan.
Gilauman sa DTI nga makatabang ang maong pasilidad sa pagpalambo sa lokal nga bamboo sector pinaagi sa pagdugang sa produksyon, pagpalapad sa merkado, ug paghatag og dugang oportunidad pang-ekonomiya sa mga negosyante sa lungsod.(JENIFFER JR. DELICA)
Source: DTI Zamboanga del Norte