Nagtinabangay ang mga empleyado sa dakbayan sa Dapitan, nasyonal nga mga ahensya, aron limpyohan ang baybayon sa Sunset Boulevard isip kabahin sa Coastal Clean-Up Drive nga gipangunahan sa City Government of Dapitan, Pebrero 13.
Ubos sa liderato ni Mayor Evelyn T. Uy, gipakita sa dakbayan ang lig-on nga paningkamot sa pagpanalipod sa kinaiyahan ilabi na sa pag-atubang sa nagkadaghang problema sa basura.
Sumala sa mga opisyal, ang kalihokan gipahigayon aron matubag ang mga kabalaka sa waste management ug maprotektahan ang kadagatan nga direktang nakaapekto sa panginabuhi sa daghang Dapitanon. Sa tibuok buntag, nagkugi ang mga partisipante sa pagpanguha og lain-laing matang sa basura, lakip ang mga plastik, botelya, ug uban pang dili malata nga mga hugaw nga nagkatag sa daplin sa baybayon.
Gipasiugda usab sa mga lider ang kahinungdanon sa kadagatan sa pagpakunhod sa epekto sa climate change, pagmintinar sa biodiversity, ug pagsuporta sa lokal nga ekosistema.
Gilauman sa lokal nga panggamhanan nga pinaagi sa padayon nga coastal clean-up ug kampanya sa kahibalo, mas molig-on ang paningkamot sa komunidad sa pagpraktis og responsableng pagdumala sa basura ug malungtarong pamaagi sa pagpanalipod sa kalikupan.(IKEN B. GULLEM)
Source: City Government of Dapitan