Gibansay sa Department of Agrarian Reform (DAR) Zamboanga del Norte ang 36 ka miyembro sa El Paraiso Multi-Purpose Cooperative sa Barangay El Paraiso, La Libertad pinaagi sa Program Orientation sa Partnership Against Hunger and Poverty (PAHP).
Gipangulohan nila PARPO II Daisy Dell Suan Digamon ug PARPO I Engr. Alfonso A. Tan ang kalihokan, pinaagi sa DAR Municipal Office sa La Libertad nga ubos sa pagpanguna ni MARPO Lerma B. Ongue.
Atol sa orientation, gipasabot sa DAR ang mga benepisyo sa PAHP ug ang papel sa kooperatiba sa pagpatuman sa mga livelihood ug market linkage programs alang sa mga Agrarian Reform Beneficiaries (ARBs).
Human sa maong kalihokan, gipadayon sa DAR ang site validation sa giplanong proyekto sa panginabuhian aron masiguro ang kaandam sa lugar ug mapadali ang implementasyon sa programa sa komunidad.
Kini nga inisyatiba kabahin sa padayon nga paningkamot sa DAR sa pagpalig-on sa panginabuhian sa mga ARBs pinaagi sa malungtarong mga proyekto ug pakigtambayayong sa mga kooperatiba.(IKEN B. GULLEM)
Source: DAR Zamboanga del Norte Province