Nagpadayon sa paghatag og dugang oportunidad ug panginabuhian sa mga mag-uuma sa Zamboanga del Norte ang EGBU Scale-Up Program ni Governor Darel Dexter Uy pinaagi sa nagkadaiyang suporta sa agrikultura nga nagtumong sa pagpalambo sa produksiyon ug pagdugang sa kita sa sektor sa panguma.
Gipasiugda ang kalampusan sa maong programa atol sa “Pasundayag sa Umahan 2026” o Harvest Festival nga gipahigayon sa Barangay Dampalan, Dapitan City diin gipadayag ni La Libertad Mayor Ricky Cuenca ug sa mga lokal nga mag-uuma ang ilang pagpasalamat sa benepisyong ilang nadawat.
Gihulagway sa mga mag-uuma ang EGBU Scale-Up Program isip usa ka “bulawanon” nga inisyatibo tungod sa dakong tabang niini sa pagpausbaw sa ilang panginabuhi ug paghatag og bag-ong paglaum sa mga pamilyang nagsalig sa agrikultura.
Padayon usab nga gipalig-on sa programa ang sektor sa panguma sa lalawigan pinaagi sa suporta nga makatabang sa mga mag-uuma aron mas mapalambo pa ang ilang produksyon ug mapadayon ang malungtarong panginabuhian sa komunidad.(JENIFFER JR. DELICA)
Source: Zamboanga del Norte Provincial News Network