Misangpot sa pagkadakop sa duha ka giilang street-level individuals ang gilusad nga buy-bust operation sa Dipolog City Police Station sa Purok Sampaguita 2, Barangay Gulayon niadtong alas 6:05 sa gabii Mayo 16, 2026.
Giila sa kapolisan ang mga nadakpan nga sila alyas Roy, 34 anyos ug walay trabaho, ug si alyas Jerry, 33 anyos, nga parehong residente sa Barangay Olingan, Dipolog City.
Gipahigayon ang operasyon pinaagi sa mga operatiba sa Dipolog City Police Station-SDET ubos sa superbisyon ni PLTCOL Khisna Bagis Asaali uban sa Regional Drug Enforcement Unit 9 ug sa koordinasyon sa Philippine Drug Enforcement Agency.
Narekober gikan sa mga suspetsado ang tulo ka sachet nga adunay gituohang shabu, buy-bust money, ug uban pang mga drug-related items. Lakip usab sa nakompiska ang usa ka P500 bill, disposable lighter, self-sealing sachet, yawe sa motorsiklo, ug usa ka Honda Wave 110 nga motorsiklo nga adunay plate number 4309.
Sumala sa imbestigasyon, ang nakuhang ilegal nga droga adunay gibana-banang gibug-aton nga mokabat sa usa ka gramo ug balor nga P6,800 base sa standard drug price.
Ang mga ebidensya ipadala sa Zamboanga del Norte Provincial Forensic Unit alang sa eksaminasyon samtang giandam na ang kaso batok sa mga nadakpan tungod sa paglapas sa Comprehensive Dangerous Drugs Act of 2002.(IKEN B. GULLEM)
Source: RoNey PaCilan Tv