Isip kabahin sa pagsaulog sa ika-27 nga P’gsalabuk Festival, gilauman nga mapuno sa musika ug kalingawan ang Dipolog Boulevard atol sa pagahimoong “Concert @ D’ Boulevard” sa Mayo 23, 2026.
Pagahiusahon sa maong kalihokan ang nagkalain-laing singers, performers ug dance groups aron maghatag og back-to-back nga pasundayag alang sa mga residente ug bisita nga motambong sa kasaulogan.
Lakip sa mga mopasundayag mao sila Ney Dimaculangan nga maoy manguna sa maong festival, uban sa ubang guest artists sama nila TNT top 4 grand finalist Almaerra Recentes, Wang Ising TV, Juliana Sevilleno, Angelo Dripin, Astin Martin, Chad Avanzado ug Jef Carram “The Big Mouth.” Magpasundayag usab ang mga grupo nga Special Delivery, Sharp HD ug Twist N’ Turn Dancesport Team.
Sumala sa organizers, tumong sa concert nga makahatag og dugang kalingawan ug mapalig-on ang selebrasyon sa festival pinaagi sa musika ug live performances.
Dugang pa sa concert, mas mahimong mabulokon ang kagabhion pinaagi sa grand fireworks display nga usa sa pinakaabangang bahin sa selebrasyon sa P’gsalabuk Festival.(IKEN B. GULLEM)
Source: Dipolog Tourism