Sa laing higayon, nagpakita og kaisog, dedikasyon, ug tinuod nga pag-alagad sa publiko ang personnel sa Dapitan City Fire Station Shift “A” ubos sa liderato ni FSINSP Rommel M. Rojas, REE, atol sa ilang pagresponde sa usa ka kritikal nga emergency medical case niadtong Mayo 16 nga nalambigit sa usa ka mabdos nga pasyente.
Pag-abot sa mga responder sa balay sa pasyente, ilang namatikdan nga naglisod na kini sa pagpanganak ug nakita nga mogawas na ang tiil sa bata, timailhan sa usa ka delikadong breech delivery. Tungod sa kakritikal sa sitwasyon, gilayon nga gidala sa responders ang pasyente ngadto sa ospital samtang nagpadayon sa paghatag og emergency assistance sulod sa ambulansya.
Bisan pa sa paspas nga pagresponde ug dakong paningkamot sa EMS team, wala maluwas ang bata ug natapos sa stillbirth ang maong insidente. Bisan pa sa kasakit ug emosyonal nga kahimtang, nagpadayon gihapon ang mga responder sa pag-atiman ug pagsiguro sa kaluwasan sa inahan hangtud makaabot sa ospital.
Ang maong insidente nagpahinumdom nga ang trabaho sa mga bombero dili lamang kutob sa pagpatay og sunog, kundili usab sa pagresponde sa mga emerhensyang medikal uban ang kalooy, propesyonalismo, ug kusog sa kasingkasing bisan sa labing lisod nga mga kahimtang.
Mipadayag usab ang Dapitan City Fire Station sa ilang pakigduyog ug pag-ampo alang sa pamilya nga naapektuhan sa maong trahedya, samtang gidayeg ang mga responder sa ilang walay hunong nga serbisyo ug sakripisyo alang sa komunidad.(JENIFFER JR. DELICA)
Source: BFP R9 Dapitan City Fire Station