Aron mas mapalambo ang serbisyo ug kaginhawaan sa mga bisita ug partisipante sa mga kalihokan sa lalawigan, gibendisyonan sa probinsiyal nga pangagamhanan sa Zamboanga del Norte ang bag-ong gi-renovate nga Halfway House ug Guest House sa Dipolog City, kaniadtong Oktubre 28, 2025.
Ang maong mga edipisyo, ubos sa liderato ni Gobernador Darel Dexter T. Uy, gidesinyo aron mahimong kapuy-an sa mga opisyal o bisita nga gikan sa halayong kalungsuran ug adunay mga opisyal ng tuyo sama sa seminar, training, o kalihokan sa dakbayan.
Si Msgr. Isagani A. Josol ang nagdumala sa pagbendisyon nga gisaksihan nila Acting Provincial Administrator Charmie A. Yu, Executive Assistant IV Imelda Endab, ug uban pang mga opisyal sa kapitolyo.
Ang Halfway House adunay unom ka lawak nga makapahimutang og napulo ka tawo matag usa, samtang ang Guest House giandam isip komportableng kapuy-an alang sa mga bisita sa lalawigan.
Kini nga inisyatiba nagpakita sa padayon nga paningkamot sa probinsiyal nga pangagamhanan sa paghatag ug maayong serbisyo ug pasilidad alang sa mga katawhan ug bisita sa Zamboanga del Norte.(IKEN B. GULLEM)
Source: Zamboanga del Norte Provincial News Network