Aron mas madugangan ang ilang kahibalo ug kahigayonan kabahin sa digital, gibansay ang mga Persons with Disabilities (PWDs) sa Dipolog City sa paggamit sa Microsoft Productivity Tools atol sa usa ka training nga gipahigayon niadtong Hulyo 16, 2026, sa Gallery 3, Museo Dipolog.
Gipasiugdahan ang pagbansay sa City Government of Dipolog pinaagi sa City Social Welfare and Development Office (CSWDO) Dipolog Tech4Ed Center, sa pakigtambayayong sa Department of Information and Communications Technology (DICT) Zamboanga del Norte.
Tumong sa kalihokan ang paghatag sa mga partisipante og praktikal nga kahibalo sa paggamit sa Microsoft productivity applications aron mapalambo ang ilang employability, produktibidad, ug digital inclusion.
Mipresentar sa pagbansay sila Project Development Officer II Al Vincent M. Recentes ug Disability Affairs Officer Roel R. Zorrilla, nga mipakigbahin sa mga epektibong teknik ug maayong pamaagi sa paggamit sa Microsoft productivity tools.
Kabahin kini sa padayon nga paningkamot sa City Government of Dipolog sa paghatag og inklusibong mga programa nga nagpalig-on sa kahibalo ug kapasidad sa mga PWD pinaagi sa teknolohiya.(IKEN B. GULLEM)
Source: Dipolog City Government