Samtang nagpadayon ang pagsaka sa presyo sa mga batakang panginahanglanon, miabot ang dugang nga kahupayan sa mga panimalay nga adunay Persons with Disabilities (PWDs) sa lungsod sa Pres. Manuel A. Roxas human 890 ka kwalipikadong pamilya ang nakadawat og tig-20 ka kilo nga bugas pinaagi sa Local Government Support Fund–Financial Assistance to Local Government Units (LGSF-FALGU) Rice Distribution Program niadtong Agusto 5.
Gipangulohan ang pagpang-apod-apod nila Municipal Social Welfare and Development Officer (MSWDO) Alfeo del Rosario Bubutan ug Tourism Officer Alito Bagaipo, uban sa suporta sa lokal nga panggamhanan ug sa Provincial Government of Zamboanga del Norte.
Matud ni Bubutan, adunay 1,500 ka rehistradong PWDs sa lungsod, apan 890 lamang ang nahimong kwalipikadong benepisyaryo tungod kay ang uban wala na makapa-renew sa ilang PWD identification cards, samtang ang uban namatay na. Gipasabot usab niya nga usa lamang ka bahin sa bugas ang ihatag matag panimalay bisan adunay kapin sa usa ka PWD nga nagpuyo niini.
Padayon usab ang pagpang-apod-apod sa rice assistance ngadto sa mga residente sa mga lagyong barangay, lakip ang Moliton, Panampalay ug uban pang kasikbit nga lugar, ubos gihapon sa LGSF-FALGU Rice Distribution Program.
Gawas sa rice assistance, nakadawat usab ang mga benepisyaryo og cash assistance pinaagi sa UPLIFT Program, nga nagtumong sa paghatag og dugang nga suporta sa mga pamilyang nanginahanglan ug sa mga vulnerable sector.(IKEN B. GULLEM)
Source: Zamboanga del Norte Provincial News Network