Gitigom sa Department of Trade and Industry–Zamboanga del Norte (DTI-ZDN) ang 51 ka lokal nga enterprise cooperators niadtong Miyerkules, Agosto 5, 2026, didto sa Dipolog School of Fisheries sa Barangay Olingan, Dipolog City, alang sa 2026 SSF Cooperators Forum.
Ang tibuok adlaw nga kalihokan, nga nagdala sa temang “Synergy in Action: Elevating SSF Cooperators through Technological Advancement, Quality Compliance, and Inclusive Growth,” nagtumong sa pagpadasig sa kalamboan sa micro, small, and medium enterprises (MSMEs) pinaagi sa paggamit sa teknolohiya, pagsunod sa mga regulasyon, ug mas lig-on nga panaghiusa sa mga ahensya sa gobyerno.
Nagpakita usab ang lain-laing produkto sa Shared Service Facility (SSF) atol sa exhibit nga gihimo sa venue, isip pagpamatuod sa mga kalambuan ug kalidad nga nab-ot sa mga lokal nga cooperators pinaagi sa programa.
Sa buntag nga sesyon, gipunting ang pagpalig-on sa pagdumala sa programa. Si Daisy Mae O. Tambolero, SSF Focal Person, mipasabut sa bag-ong Digital/Online Monitoring Form, samtang si Engr. Jerry N. Muit, SSF Coordinator, mihatag og importanteng pahimangno gikan sa Bureau of Small and Medium Enterprise Development (BSMED).
Si Angelita P. Lanzado, Provincial Fiber Officer sa Philippine Fiber Industry Development Authority (PhilFIDA-ZDN), mipasabot sa mga standard sa pagproseso sa hilaw nga materyales sama sa abaca ug nito, samtang si Engr. January Lee J. Balagot, CDO Agriculturist II sa Philippine Coconut Authority (PCA-ZDN), mihatag og mga kahibalo sa value-adding technologies para sa mga coconut processing facilities. Mianhi usab si Elpedio A. Espiritu Jr., Acting Division Chief sa PCA, aron suportahan ang maong inisyatiba.
Gipahibalo usab ni Sharon Rose P. Garcia, Director II sa Food and Drug Administration (FDA) Mindanao West Cluster, ang mga kinahanglanon sa License to Operate (LTO) site requirements alang sa mga processing facility operators. Gitapus ni Engr. Adrian B. Ampong, Provincial Director sa TESDA-ZDN, ang mga briefing pinaagi sa pagpaila sa community-based skills training ug mga scholarship program para sa mga operator.
Sa hapon nga Inter-Agency Open Forum, nakig-istorya ang mga cooperators sa mga representante gikan sa DTI, PhilFIDA, PCA, FDA, ug TESDA pinaagi sa open floor panel ug plenary discussion. Taliwala sa mga nahisgutan mao ang mga kalisdanan sa operasyon, kakulang sa paggamit sa makinarya, teknikal nga balakid, ug mga oportunidad sa market linkage.
Natapos ang forum pinaagi sa paghatag og mga sertipiko ug pagpasidungog sa mga partner agencies nga gipangulohan ni Director Roda. Sa iyang closing remarks, gipasiugda ni Raymunda B. Biolango, Business Development Division Chief sa DTI-ZDN, ang padayon nga paningkamot sa ahensya sa pagpalig-on sa kompetitiveness sa mga lokal nga negosyo sa tibuok lalawigan. (IKEN B. GULLEM)
Source: DTI Zamboanga del Norte