Nagbunga og maayong resulta ug nakadala og dungog ang Team Dapitan atol sa Philippine Open 2026 International Darts Tournament nga gipahigayon sa Winford Resort & Casino Manila.
Ubos sa bandila sa Team Dapitan/Team Philippines, girepresentahan nila Shirbert Acaylar, Lito Palon, ug Grace Pausal ang siyudad ug ang nasud, diin nakigsangka sila kaniadtong Hulyo 29 hangtod Agosto 1 batok sa kapin sa 800 ka mga magdudula gikan sa nagkadaiyang nasud.
Lakip sa mga miapil ang mga atleta gikan sa Japan, South Korea, Thailand, United Arab Emirates, Mongolia, Croatia, Estados Unidos, Malaysia, ug uban pang internasyonal ug rehiyonal nga mga koponan, nga naghimo sa maong torneyo isip usa sa labing prestihiyosong kompetisyon sa darts sa nasud.
Bisan sa kusog nga kompetisyon, nakapakita ang Team Dapitan og katukma, determinasyon, ug maayong sportsmanship nga misangpot sa ilang mahinungdanong mga nahimo. Nakuha sa tulo ang ika-5 nga puwesto sa Classified Triples, samtang si Grace Pausal mitapos sa ika-9 nga puwesto sa Women’s Singles ug ika-17 nga puwesto sa Women’s Fixed Doubles.
Nakasulod usab sila sa ika-17 nga puwesto sa laing Classified Triples category, nga nagpakita sa ilang makanunayon nga performance atol sa torneyo.
Gawas sa opisyal nga kompetisyon, nakapakita usab og talagsaong katukma ang mga Dapitanon sa mga espesyal nga challenge sa torneyo. Malampusong nahuman ni Pausal ang “Any Triples” Challenge, samtang nakapahimutang si Acaylar og eksaktong bull’s-eye pinaagi sa usa ka tira sa WINMAU Challenge.
Sumala kang Acaylar, dako ang ilang pasalamat sa City Government of Dapitan ubos sa pagpanguna ni Mayor Evelyn “Belen” T. Uy tungod sa padayon nga suporta ug pagdasig nga ilang nadawat. Matud pa niya, maong tabang maoy naghatag kanila og inspirasyon aron ipakita ang ilang labing maayo ug mapahitas-on nga marepresentar ang Dapitan ug ang Pilipinas sa internasyonal nga entablado.
Gipahalipayan usab sa City Government of Dapitan ang Team Dapitan sa ilang maayong nahimo, nga giila isip usa ka pamatuod sa talento, disiplina, ug dedikasyon sa mga Dapitanong atleta. Ang ilang kalampusan nagdala og garbo sa siyudad ug nagsilbing inspirasyon sa sunod nga henerasyon sa mga manlalaro nga mopadayon sa pagtinguha sa kahusayan sa sports.(IKEN B. GULLEM)
Source: Dapitan City Government