Nagpalig-on ang Department of Trade and Industry (DTI) ug LGU Dapitan sa digital empowerment sa mga negosyante human malampusong gipahigayon ang Batch 1 sa Social Media Marketing Seminar niadtong Pebrero 10, 2026 sa City Mayor’s Office Conference Room.
Gitambongan kini sa micro, small, ug medium enterprises (MSMEs) ug mga social media personnel sa nagkalain-laing opisina sa syudad aron mahatagan og praktikal nga kahibalo sa pagpalig-on sa branding, promosyon sa produkto, ug epektibong komunikasyon online. Kabahin kini sa digital capacity-building agenda ni Evelyn T. Uy alang sa progresibong Bag-ong Dapitan.
Gipangunahan ang sesyon nila John Edgar Macapas, Senior Trade-Industry Development Specialist ug Trade Promotion Officer, ug Daisy Mae Tambolero, Trade-Industry Development Specialist. Gipasiugda nila ang hustong paghimo og sulod, visual branding, pagpalambo sa audience engagement, ug responsableng paggamit sa social media aron mapalapad ang merkado ug mapalig-on ang pagsalig sa kustomer.
Human sa malampusong Batch 1, nakatakda ang Batch 2 karong Marso ug abli sa interesadong mga negosyante. Pinaagi sa padayon nga pakigtambayayong sa DTI ug ubang ahensya, gipamatud-an sa LGU Dapitan ang baruganan niini sa pagpalambo sa negosyo, inobasyon, ug mas episyenteng pagserbisyo sa publiko sa digital nga panahon.(JENIFFER JR. DELICA)
Source: City Government of Dapitan