Nagpahigayon og tulo ka adlaw nga pagbansay ang Philippine Statistics Authority (PSA) Zamboanga del Norte alang sa Community- Based Monitoring System Validation sa mga benepisyaryo sa Department of Social Welfare and Development (DSWD) gikan Marso 30 hangtod Abril 1, 2026 sa A4M Building, Arellano Extension, Barangay Miputak.
Gipangulohan ang training ni Senior Statistical Specialist Edna D. Kiskis, Provincial Focal Person, uban ni Statistical Analyst Al Kalam V. Caluang ug gitambongan kini sa duha ka gi-hire nga Statistical Researchers (SRs).
Tumong sa kalihokan ang paghimo og kompleto, updated, ug komprehensibong listahan sa mga benepisyaryo sa social protection programs. Lakip sa mga buluhaton ang pag-ila sa mga wala pa malista nga benepisyaryo, pag-update sa kasamtangang rekord sa Community-Based Monitoring System (CBMS), ug pag-validate sa datos aron mapahiuyon ang mga database sa gobyerno.
Gilauman usab nga makatabang ang maong validation sa pagpadali sa data collection atol sa implementasyon sa Walang Gutom Program (WGP), ilabi na sa food redemption activities. Tumong sa DSWD nga mapahiusa ang ilang datos gikan sa CBMS aron masiguro ang hustong paglista sa mga benepisyaryo sa nagkalain-laing programa sama sa Pantawid Pamilyang Pilipino Program (4Ps), Social Pension, ug WGP.
Giawhag usab sa PSA ang kooperasyon sa publiko, ilabi na sa mga respondente ug benepisyaryo, aron masiguro ang kalampusan sa kalihokan.(IKEN B. GULLEM)
Source: PSA Zamboanga del Norte