Naghiusa ang City Peace and Order Council (CPOC) ug City Development Council (CDC) sa ilang unang quarterly meeting alang sa tuig 2026 nga gipahigayon niadtong Marso 31 sa Social Hall sa Museo Dipolog.
Gipangulohan ang tigum ni City Vice Mayor Senen O. Angeles, uban sa pagdumala sa sekretaryat ni City Planning and Development Coordinator Engr. Albert S. Alimpulos. Mitambong usab ang mga representante gikan sa nagkalain-laing ahensya sa gobyerno ug partner stakeholders.
Gipunting sa tigum ang paghatag og pinakabag-ong report sa kahimtang sa peace and order sa siyudad, diin gisusi ang mga lakang aron mapadayon ang kalinaw ug seguridad sa komunidad.
Gihisgutan usab ang pag-amendar sa 20% Development Fund alang sa 2026, pinasikad sa bag-ong Notice of Cash Allocation (NTA) nga gi-isyu sa Department of Budget and Management (DBM), aron masiguro ang hustong paggamit sa pondo sa mga prayoridad nga proyekto.
Apil usab sa agenda ang nominasyon sa mga representante sa Civil Society Organizations (CSOs) ug ang paghan-ay sa komposisyon sa Local Project Monitoring Committee (LPMC), nga magbantay sa implementasyon sa mga programa ug proyekto sa dakbayan.
Ang maong hiniusang tigum nagpakita sa padayon nga paningkamot sa lokal nga panggamhanan sa Dipolog nga ipahiusa ang kalinaw ug kalamboan alang sa mas lig-on ug progresibong komunidad.(IKEN B. GULLEM)
Source: Dipolog City Government