Malampusong gipahigayon sa Empowerment and Reaffirmation of Paternal Abilities (ERPAT) ang ilang unang quarterly meeting kaniadtong Marso 31 sa Government Center Amphitheater, diin gipunting ang pagpalig-on sa mga programa alang sa mga amahan ug ang paglatid sa mas klarong direksyon sa organisasyon.
Gipangulohan ang kalihokan ni Konsehal Atty. Jenneth N. Baje, Chairperson sa Committee on Women and Family Relations, uban ni City Social Welfare and Development Office (CSWDO) head Marilyn S. Sy, ERPAT City President Nerio C. Lobitaña, ug mga presidente gikan sa 26 ka barangay.
Sa mensahe ni konsehal Atty. Baje, gipasiugda niini ang dakong papel sa ERPAT sa pagtukod og lig-on nga katilingban. Matud niya, ang kusgan nga komunidad nagsugod sa panimalay, ug samtang importante ang paghatag gahum sa kababayen-an, kinahanglan usab nga palig-onon ang papel sa mga amahan aron mapalig-on ang pundasyon sa pamilya.
Usa sa mga highlight sa maong tigum mao ang planong reorganisasyon sa mga opisyal sa ERPAT sa lebel sa barangay nga ipahigayon gikan Abril hangtod Hunyo 2026. Tumong niini nga mapabag-o ang liderato, mapadasig ang partisipasyon sa mga miyembro, ug masiguro nga ang mga kalihokan sa matag barangay nakaangkla sa mga programa sa CSWDO.
Gipahibalo usab sa mga miyembro ang bahin sa pondo sa organisasyon, lakip ang ₱120,000 nga gigahin alang sa selebrasyon sa International Men’s Day.
Natapos ang tigum pinaagi sa panumpa sa mga miyembro nga padayon nilang palig-onon ang papel sa amahan isip tigpanalipod sa panimalay. Pinaagi niini, nagpadayon ang ERPAT sa pagbarug isip haligi sa kalig-on ug panaghiusa sa mga pamilya sa Dakbayan sa Dapitan.(IKEN B. GULLEM)
Source: City Government of Dapitan