Dako og benepisyo ang nadawat sa Persons Deprived of Liberty (PDL) ug sa mga jail personnel human sa Drug Symposium nga gipahigayon sa Salug District Jail sa pakigtambayayong sa Philippine Drug Enforcement Agency (PDEA).
Ang kalihokan, nga gipangunahan ni Acting Jail Warden JSINSP Rolly L. Paner, nagtumong sa paghatag og mas lawom nga pagsabot bahin sa epekto sa ilegal nga droga ug pagdasig sa pagbag-o sa panghunahuna ug pamatasan sa mga partisipante.
Pinaagi sa symposium, nakakat-on ang mga PDL sa kahinungdanon sa paglikay sa ilegal nga droga ug sa pagpadayon sa rehabilitasyon aron mahimong mas maayong indibidwal sa umaabot. Nakabenepisyo usab ang jail personnel pinaagi sa dugang nga awareness ug impormasyon nga makatabang kanila sa pagsuporta sa anti-drug campaign sa gobyerno.
Gituohan sa jail management nga ang maong programa makatabang sa paghimo og mas disiplinado, maalamon, ug reform-oriented nga komunidad sulod sa pasilidad.(IKEN B. GULLEM)
Source: Salug District Jail-BJMP R9