Temporaryong ipasarado sa Department of Public Works and Highways (DPWH) ang Quezon Bridge sa Dipolog City sugod karong Oktubre 29, 2025, aron masiguro ang kaluwasan sa publiko human makit-an ang depekto sa mga steel members ug kadaut sa pier niini.
Sumala sa DPWH, temporaryo kining ipasira alang sa tanang klase sa sakyanan ug mga naglakaw hangtod sa sunod nga pahibalo samtang padayon ang inspeksyon ug pag-ayo sa mga inhenyero.
Aron mapagaan ang trapiko, girekomenda sa ahensya nga gamiton sa mga motorista ang Minaog–Dicayas–Turno Bypass Road ug Airport Road padulong sa F. Lacaya Street isip mga alternatibong agianan.
Nanawagan usab sa publiko ang DPWH ug District Public Information Office nga motuman sa mga gi-isyu nga pahimangno ug magplano daan sa ilang biyahe aron malikayan ang kalangan. Samtang, alang sa dugang impormasyon ug mga update, gi-awhag ang tanan nga i-scan ang QR code nga giandam sa opisina.(IKEN B. GULLEM)
Source: Zamboanga del Norte Provincial News Network