Padayon nga gisuportahan sa Department of Science and Technology Region IX (DOST-IX) ang pagpalambo sa lokal nga negosyo pinaagi sa teknolohiya aron mas mapalig-on ang produksyon ug kompetisyon niini sa lokal ug internasyonal nga merkado.
Niadtong Agosto 11, 2026, gipangulohan ni DOST-IX Undersecretary for Regional Operations Engr. Sancho A. Mabborang, uban sila ni DOST-IX Regional Director Ms. Rosemarie S. Salazar ug Provincial Director Nuhman M. Aljani, ang project visit sa Dipolog Livelihood Distribution Inc. (DLDI) sa Dipolog City.
Gipasiugda sa maong pagbisita ang epekto sa suporta sa DOST pinaagi sa Small Enterprise Technology Upgrading Program (SETUP), ilabi na ang ₱5-milyon nga aprobahan nga proyekto sa kompanya nga gitawag og “Upgrading the Production Facility of Dipolog Livelihood Distribution Inc.”
Pinaagi sa maong proyekto, gipauswag sa DLDI ang ilang production facility alang sa bottled sardines aron mas maandam ang kompanya sa pagsunod sa mga sumbanan nga gikinahanglan alang sa export-ready production.
Tungod sa pag-angkon sa mga bag-ong kagamitan ug pag-upgrade sa production facility, mas andam na ang kompanya sa pagpalapad sa ilang merkado ug pagdala sa ilang bottled sardines ngadto sa internasyonal nga merkado.
Nagpakita kini kung giunsa sa intervention sa DOST-IX pinaagi sa teknolohiya ug innovation pagtabang sa mga lokal nga negosyo aron mahimong mas episyente, kompetitibo, ug andam sa pag-atubang sa global market.
Dili lamang pagpalambo sa negosyo ang epekto sa proyekto, kondili naghatag usab kini og dugang nga oportunidad sa panginabuhian sa komunidad. Sukad pa sa unang mga tuig sa operasyon niini, nakahatag na og trabaho ang DLDI, ilabina sa mga inahan sa komunidad.
Pinaagi sa malampusong pakigtambayayong sa DOST-IX ubos sa SETUP, napalapad sa kompanya ang ilang workforce ug nakamugna og dugang nga oportunidad sa trabaho alang sa mga miyembro sa komunidad.
Ang maong project visit kabahin sa Zamboanga Peninsula Regional Science, Technology, and Innovation Week 2026, nga nagpakita sa dakong papel sa science, technology, ug innovation sa pagpalig-on sa mga lokal nga negosyo, pagmugna og trabaho, ug pag-abli sa bag-ong oportunidad alang sa pagpalapad sa merkado ngadto sa internasyonal nga lebel.(IKEN B. GULLEM)
Source: DOST Regional Office No. IX