Naapektuhan ang dose ka panimalay ug nababagan ang usa ka dalan human sa landslide nga nahitabo sa Barangay Don Eleno, Sergio Osmeña niadtong Hunyo 12 tungod sa kusog ug padayon nga pag-ulan.
Base sa report sa Municipal Disaster Risk Reduction and Management Office (MDRRMO), milungtad og kapin tulo ka oras ang pag-ulan nga maoy hinungdan sa pagkaanod sa yuta gikan sa kabukiran ngadto sa komunidad.
Gipakita sa inisyal nga assessment nga ang pagdahili sa yuta naggikan sa taas nga bahin sa bukid nga nahimutang duol sa utlanan sa Barangay Don Eleno ug sa lungsod sa Don Victoriano, Misamis Occidental. Gituohang nakadugang sa kadaot ang kusog nga pag-agos sa tubig-ulan nga miigo sa lugar sulod sa pipila ka oras.
Tungod sa insidente, 12 sa 45 ka panimalay sa maong komunidad ang naitalang adunay partial damage samtang naputol usab sa makadiyot ang normal nga paglihok sa transportasyon tungod sa natabunang dalan. Samtang, walay naitalang namatay o nasamdan sa maong insidente, sumala sa MDRRMO.
Sa laing bahin, mipadala dayon og mga personnel ang Provincial Disaster Risk Reduction and Management Office (PDRRMO) ug Provincial Social Welfare and Development Office (PSWDO) ubos sa direktiba ni Governor Darel Dexter T. Uy aron sa paghatag og assistance ug pagtabang sa mga pamilyang naapektuhan sa landslide.
Padayon usab ang pagmonitor sa mga otoridad sa lugar tungod sa posibilidad sa dugang nga pagdahili sa yuta kon magpadayon ang pag-ulan sa mga umaabot nga adlaw.(IKEN B. GULLEM)
Source: Zamboanga del Norte Provincial News Network