Duyog sa ilang paningkamot sa pagpalambo sa edukasyon ug pagtabang sa mga kabataang anaa sa hilit nga komunidad, nagpahigayon og community outreach program ang Jose Rizal Memorial State University (JRMSU) Cooperative sa San Francisco Elementary School niadtong milabay nga adlaw.
Ang San Francisco Elementary School usa sa mga giila nga “last mile schools” sa Dapitan City Division nga nag-atubang og mga hagit tungod sa kalay-on sa lokasyon ug kakulang sa mga pasilidad ug kahinguhaan.
Isip kabahin sa maong programa, gipanghatagan og food packs ang tanang mga estudyante samtang giturn-over usab ang mga bag-ong wall fans aron makatabang sa pagpaayo sa kahimtang sa mga classroom ug sa paghatag og mas komportable nga palibot alang sa pagkat-on.
Gipasiugda sa JRMSU Cooperative nga ang maong inisyatiba dili lamang paghatag og materyal nga tabang kondili usa usab ka paagi sa pagpakita sa suporta sa mga eskwelahang nanginahanglan og dugang nga pag-atiman ug pagtagad.
Atol sa turnover ceremony, gipahayag ni Dr. Wilfredo Carreon Jr., Chairman sa Board of Directors sa kooperatiba, nga nagplano sila og dugang pang mga malungtarong proyekto aron mapadayon ang pagtabang ug pagpalambo sa eskwelahan sa umaabot.
Dako usab ang pagpasalamat ni School Head Maricel T. Gagan sa JRMSU Cooperative alang sa ilang pagkamanggihatagon ug pagpakabana sa kahimtang sa eskwelahan. Matud niya, ang maong suporta nakahatag og paglaom ug inspirasyon sa mga estudyante, magtutudlo, ug sa tibuok komunidad.(IKEN B. GULLEM)
Source: DepEd Tayo- Division of Dapitan