Nagpakita sa lig-on nga suporta alang sa pagpreserbar sa kalikupan ang Dakbayan sa Dapitan pinaagi sa pagpahigayon og mangrove tree planting activity sa Barangay Sinonoc niadtong milabay nga adlaw nga gipangulohan ni Mayor Evelyn “Belen” Uy.
Miatubang usab sa kalihokan ang mga kawani sa City Environment and Natural Resources Office (City ENRO) ubos ni Dr. George Olario, mga opisyal sa barangay nga gipangulohan ni Barangay Chairman Marivie Petalcorin, ug mga boluntaryo gikan sa komunidad.
Tumong sa maong inisyatiba ang pagpalig-on sa proteksyon sa mga baybayon batok sa erosion ug pagkonserbar sa marine ecosystem pinaagi sa pagpasig-uli sa mga puy-anan sa mga isda ug uban pang yamang-dagat.
Padayon usab nga gipasiugda sa administrasyon ni Mayor Uy ang pagpatuman sa mga programang pangkalikupan isip kabahin sa pag-andam sa komunidad batok sa epekto sa climate change ug aron masiguro ang malungtarong kalamboan sa Dapitan.(IKEN B. GULLEM)
Source: Dapitan City Government