Opisyal nga giturn-over sa Department of Labor and Employment (DOLE) Region IX ang Livelihood Enhancement Project alang sa Multidimensional Assiduous Mothers Association (MAMA) atol sa usa ka pormal nga turnover ceremony niadtong Agosto 20, 2025, nga gipahigayon sa Dipolog Food Hub, Sunset Boulevard, ning dakbayan.
Ang maong proyekto naglakip sa food processing, pastry, ug sweets production, nga nagtinguha sa pagpahugot sa income-generating activities sa asosasyon. Tumong niini ang pagpalambo sa panginabuhi sa mga miyembro ug pagpalig-on sa ilang kapasidad sa pagpanginabuhi.
Gipangulohan ang turn-over ceremony sa DOLE Region IX Chief LEO nga si Ms. Aileen Modejar, uban ni City Councilor Praxides P. Rubia, isip representante ni Mayor Roberto Y. UY, mitambong usab si Ms. Noriza M. Asprer, gikan sa Public Employment Service Office (PESO) isip representante ni PESO Manager Carlo P. Deloria.
Ang maong inisyatibo nagpamatuod sa paningkamot sa DOLE Region IX sa paghatag ug suporta sa mga lokal nga asosasyon pinaagi sa livelihood projects nga nagatabang sa pagpalambo sa kabuhatan ug panginabuhi sa komunidad.
Pinaagi sa Livelihood Enhancement Project, gilauman nga mas mapaayo ang kapasidad sa mga miyembro sa Multidimensional Assiduous Mothers Association (MAMA) sa paghimo og produkto nga maka-generate og dugang kita, ug mapalig-on ang ilang papel sa ekonomiya.(Jumalisa Papa)
Source: Dipolog City Government