Gitambongan sa 314 ka healthcare frontliners gikan sa tibuok Zamboanga del Norte ang Liwanag Advocacy Batang 2000: The First and Next 1,000 Days of Life nga gipahigayon sa Ground Floor, Plenary Hall sa ZN Convention and Exhibition Center, Hunyo 25 aron mapalig-on ang kahibalo sa pag-atiman sa mga inahan ug kabataan.
Gipasiugdahan ang kalihokan sa UNILAB sa pakigtambayayong sa Provincial Government of Zamboanga del Norte pinaagi sa Provincial Health Office ubos sa pagpangulo ni Dr. Benson Panaguiton.
Atol sa programa, gipaambit nila Dr. Efraim Culminas ug Dr. Riezyl Barbadillo-Culminas ang kahinungdanon sa hustong nutrisyon, kalidad nga pag-atiman sa inahan ug bata, ug sa unang ug sunod nga 1,000 ka adlaw sa kinabuhi sa usa ka bata isip pundasyon sa maayong panglawas ug husto nga pagtubo.
Gitambongan usab ang kalihokan sa mga Barangay Health Workers (BHWs), Barangay Nutrition Scholars (BNS), midwives, nurses ug uban pang healthcare personnel. Nagpahayag usab og suporta ang mga opisyal sa UNILAB sa padayon nga panagtambayayong sa lokal nga gobyerno aron mapalig-on ang mga programa sa maternal ug child health sa lalawigan.(IKEN B. GULLEM)
Source: Zamboanga del Norte Provincial News Network