Mipirma og Memorandum of Agreement (MOA) ang Department of Health Zamboanga Peninsula Center for Health Development (DOH ZP-CHD) ug DOH Central Visayas Center for Health Development aron ipatuman ang web-based system alang sa MAIFIP program. Nahitabo kini human sa system orientation nga gitumong sa pagpalig-on sa digital nga pagdumala sa mga transaksiyon sa programa.
Sa maong kalihokan, gitudloan ang MAIFIP team sa Zamboanga Peninsula sa hustong proseso sa pag-encode, pag-monitor ug pagreport sa datos pinaagi sa web-based system nga gihimo sa DOH Central Visayas. Tumong niini nga masiguro ang tukmang data management ug mas paspas nga pagproseso sa mga transaksiyon sa tanang partner facilities.
Pinaagi sa MOA, masiguro ang standardized nga paggamit sa sistema sa rehiyon ug mapalambo ang koordinasyon sa paghatag sa medical assistance. Gilauman usab nga mas mapaspas ug mahimong mas transparent ang paghatag og tabang sa mga pasyente nga indigent ug walay igong kapasidad sa pagbayad sa gastong medikal.
Gipasiugda sa DOH ZP-CHD nga ang paggamit sa digital nga sistema kabahin sa padayon nilang paningkamot aron mapalambo ang access sa serbisyo sa panglawas ug mapalapad ang epektibong paghatag og medical assistance sa mga nanginahanglan sa rehiyon.(JENIFFER JR. DELICA)
Source: DOH Zamboanga Peninsula CHD