Gipakusgan pa sa City Government of Dipolog ug sa Department of Health (DOH) ang ilang panaghiusa aron masiguro nga tanang kabataan sa siyudad makadawat og kompleto ug tukmang bakuna batok sa nagkalain-laing sakit.
Niadtong hapon sa Enero 27, 2026, nagkahiusa sa usa ka diskusyon ang mga opisyal sa DOH ug lokal nga pangagamhanan aron hisgutan ang mga estratehiya sa pagpalambo sa National Immunization Program (NIP) sa Zamboanga Peninsula, ilabi na ang pagpalapad sa serbisyo sa pagbakuna alang sa mga bata sa Dipolog.
Gipangulohan sa HFSRB–DOH Central Office Director IV Engr. Annette B. Tan ang delegasyon sa DOH, uban ang mga key health officials gikan sa rehiyon ug lokal nga lebel. Sa miting, gitutukan ang mas lig-on nga koordinasyon tali sa city government, mga ospital, ug health offices aron mas dali maabot ang mga ginikanan ug kabataan nga wala pa mabakunahan.
Sumala sa city government, ang kahimsog ug kaluwasan sa kabataan nagpabiling prayoridad, ilabi na sa pagpugong sa mga sakit nga mapugngan pinaagi sa bakuna. Lakip sa gihisgutan ang pagpaayo sa information drive, mas organisadong vaccination schedules, ug pagpalig-on sa suporta sa barangay health workers.(IKEN B. GULLEM)
Source: Berto Uy